Винчованки чолнїкох Покраїнскей влади и Нового Саду з нагоди Велькей ноци

автор зам
979 Опатрене

НОВИ САД – Предсидатель и подпредсидатель Покраїнскей влади др Боян Пайтич и Михаль Нїлаш, котри и покраїнски секретар за образованє, предписаня, управу и национални меншини, вчера повинчовали Вельку ноц церковним поглаваром, священству и вирним, котри тото швето славя по григориянским календаре.

– У мено Покрїнскей влади и особнє, жадам вам же бисце Вельку ноц дочекали и преславели у кругу своїх наймилших и найлюбенших. Най тото швето шицким принєше щесце, благостан и медзисобне порозуменє – гвари у своєй винчованки др Боян Пайтич.

Подпредсидатель Покраїнскей влади Михаль Нїлаш тиж винчує священству и вирним щешлїви вельконоцни днї, жадаюци им любов, мир, здравє и щесце, з медзисобним почитованьом и толеранцию.

– Найвекше християнске швето – Велька ноц и воскреснуце Христово – то славенє побиди живота над шмерцу, хтора нам дава моц и виру витирвац на Христовей драги любови и правди – гвари Михаль Нїлаш у своєй винчованки.

Вельку ноц по григориянским календаре вчера повинчовал и городоначїлнїк Нового Саду Милош Вучевич, котри шицким котри тераз славя тото вельке швето пожадал най го препровадза у духовним и всеобщим миру, медзисобним порозуменю и толеранциї, зоз своїма фамелиями и приятелями.

ПОВЯЗАНИ ТЕКСТИ