БЕОҐРАД – Постої можлївосц же Кулски образовни центер без законских овласценьох уписує студентох на факултет, та пошвидко Републична просвитна инспекция будзе випитовац роботу тей установи.
Кулски образовни центер бул промововани як „универзитетски центер у Кули“, „кулска академия“ (у просторийох дакедишнєй Фабрики арматурох ”Истра”), а то у ствари аґенция хтора реґистрована за менаджмент и консалтинґ, пише Войводянски виглєдовацко-аналитични центер (ВОИЦЕ). Новинаре хтори виглєдовали тоту тему дошли до податкох же Кулски образовни центер понука вецей файти студийох на вецей приватних факултетох, з хорих анї єден нє ма дозволу за роботу у кулским оддзелєню.
У Министерстве просвити гварели же лєм високошколска установа шме уписовац студентох и же закон при уписованю нє предвидзує нїяких поштреднїкох. Наставу ше отримує у шедзиску високошколскей установи, або видвоєном оддзелєню хторе ма акредитацию, поручели з Министерства и додали же у Кули нє сполнєте анї єдно з начишлєних условийох.