НОВИ САД – Од вчера, 12. фебруара, мож придац вимоги за виробок рочних картох за превоз у городским и пригородским транспорту за одредзени катеґориї гражданох. Як сообщело Явне городске транспортне подприємство (ЯГТП) „Нови Сад“, тоти гражданє за рочну карту видвоя вєдно 2 025 динари.
Єст 13 катеґориї хтори можу правиц рочну карту, а то шлєпи и слабовиди особи, особи котри маю параплеґию, дистрофию, дзецинску парализу, мултиплу склерозу, дзеци з почежкосцами у розвою, инвалидитетом, особи на диялизи и котри маю пресадзени орґани, та инвалиди котри страдали у войнох 90-их рокох. Ту спадаю и вибеженци, вигнати и розселєни особи котри часто ходза на контроли до дохтора, гражданє Нового Саду старши од 65 роки, добродзечни давателє креви котри дали крев вецей як 50 раз (жени), або 100 раз (хлопи). Дзеци з фамелийох з трома, або вецей дзецми тиж маю право на рочну карту по конєц школованя, односно по 26. роки.
За гражданох старших од 65 роки карти ше видава на шейсцох предавацких местох ЯГТП, за дзеци з фамелийох з трома, або вецей дзецми, вимогу ше придава на шалтеру 12 Медзимесней автобускей станїци, а шицки други вимоги треба придац на Медзимесней станїци, на шалтеру дзе ше наплацує карти.
Детальнєйше о потребней документациї и процедури мож опатриц на линку: https://www.gspns.co.rs/karte-godisnje.php