РУСКИ КЕРЕСТУР – Початок тогорочного Фестивалу рускей култури вчера на манифестациї „Червене пупче” привитал и висланїк предсидателя Републики Сербиї Томислава Николича, його совитнїк за културу Радослав Павлович. На бини го привитал предсидатель Орґанизацийного одбору „Червеней ружи” Желько Ковач, а Радован Павлович пренєсол поздрави предсидателя Николича и визначел же Руснаци драгоцини камень на мапи Войводини и Сербиї, хтори сами маме чувац, а держава у тим поможе найлєпше як годна.
Програма „Червеного пупча” почало зоз свою гимну „Нашо швето”, хтору одшпивал Дзецински хор ”Шкорванчки” Дому култури з Руского Керестура, а потим наступели наймладши – Шпивацка ґрупа Музичней оводи у Руским Керестуре.
У другей часци „Червеного пупча” наступели руски дзецински ансамбли Културно-уметнїцких дружтвох зоз скоро шицких наших местох.
Наймасовнєйши були дзецински ансамбли домашнїх танєчнїкох, Дому култури Руски Керестур, хтори наступели як Пририхтуюца, Младша, Штредня и Старша дзецинска ґрупа, а тиж и млади аматере з Дюрдьова, з КУД „Тарас Шевченко”, з трома возроснима ґрупами танєчнїкох, та оркестром и шпивачами.
И на тогорочним „Пупчу” були и госци з Горватскей – Дзецинска ґрупа КУД „Яким Ґовля” з Миклошевцох, а наступели и мали танєчнїки з наших друштвох у Сриме – Младша дзецинска ґрупа КПД „Иван Котляревски” з Бикичу, та Дзецинска ґрупа КПД „Дюра Киш” зоз Шиду.
Публики ше представели и наймладши фолклораше з КПД „Карпати” з Вербасу, КУД „Петро Кузмяк” з Нового Орахова, Дзецинска ґрупа Руского културного центру з Нового Саду и Дзецинска ґрупа КУД „Жатва” з Коцура.
По традициї, „Червене пупче” закончене зоз шпиванку „Тисяч радосци”, у виводзеню домашнього Хору „Шкорванчки”, под дириґенством Юлияна Рамача, а по законченю програми, у дворе Школи отримани диско за дзеци.
Вецей фотоґрафиї з „Пупча” у фото-ґалериї на сайту „Руского” и Рутенпресу.