Вистави наших подобових уметнїцох з Кули

автор сен/маф
1.2k Опатрене

КУЛА – У рамикох програми означованя Националного швета Руснацох у Кули, у подобовей ґалериї Културного центру Кула отримана вистава Лидиї Барновей, а потим у Клубу Културного центру вистава Амалиї Ковач, обидвох з Кули.

Лидия Барна академска подобова уметнїца, котра свойо роботи викладала на колективних виставох у Сербиї и швеце, а за собу ма седем самостойни вистави. Тема роботох хтори представени на вистави з нагоди националного швета то „Гармония космосу”, а як гварела авторка, тот циклус приказує широки простор, хтори патрача уводзи до своєй глїбини. На малюнкох доминую круги, хтори символ безпредметного и безчасово, прето же круги нє маю свой початок и конєц.

Виставу отворели Александер Мудри и директор Заводу за културу войводянских Руснацох Серґей Тамаш, а на самим початку госци слухали Ивану Ґруїчич, котра на гушлї одграла тему з филму „Шиндлерова лїстина”.

После вистави Барновей, госци отворена и перша самостойна вистава Амалиї Ковач. Виставу отворел тиж Серґей Тамаш, а рецензию Амалийових малюнкох представела рецензентка Лидия Барна. По єдну музичну и рецитаторску точку виведла Амалияйова унука Лїляна Кнежевич.

Амалия Ковач ше аматерски занїма з подобову уметносцу. Малюнки хтори представени на вистави приказую ровнїну, фамелию, та носталґию за дакедишнїм часом. На дзепоєдних малюнкох виписани и стихи з познатей писнї „Хижочко стара”, хтора виволує праве чувства носталґиї.

На уходзе до Клубу дзе була вистава два млади членїци Руского КУД, поприберани до народного облєчива, нащивительом дзелєли привязки з амблемом КУД „Др Гавриїл Костельник”, хтори направени за тоту, як и з нагоди тогорочней 20-рочнїци Дружтва.

 У голу Културного центру бул виложени и етно-стол хтори за коло 200 особи пририхтали членїци Здруженя женох „Байка” з Руского Керестура, на чолє з предсидательку Славицу Катона. Вони пририхтали традицийни руски єдла, як цо то белюши, капущанїки, череги, рижни поґачики и инше, а ґу тому предложени и сухи месово продукти.

З отвераня вистави роботох Лидиї Барновей; у ґалериї и з вистави Ковачовей и етно-столу (Фото: М. Зазуляк, М. Афич, Лю. Дудаш и В. Вуячич)

ПОВЯЗАНИ ТЕКСТИ