Того року славиме 30. родзени дзень Фестивалу новей рускей народней шпиванки „Ружова заградка”. На самим початку, 1990. року, нїхто нє роздумовал же рубрика „Зоз ружових заградкох”, котра ше соботами емитовала у емисиї „Сервис 97” на наших радио габох, прерошнє до фестивалу. „Ружова заградка” урядово постала Фестивал 1999. року и тирва у континуитету по нєшка. Велї учашнїки за три децениї прешли през „Ружову заградку”, а кажди єй охабел цошка свойо. Фестивал, вєдно з тогорочним репертоаром, будзе мац 402 нови руски народни шпиванки, зняти у Радио Новим Садзе, а котри ше каждодньово емитую у нашей програми. На тот способ, велї з нїх вошли до наших обисцох, до нашей култури, постали наисце народни.
„Ружова заградка” нєшка фестивал Радио телевизиї Войводини, єдина фестивалска манифестация нашей Хижи, Покраїнского явного медийного сервису. То велька помоц и олєгчанє у роботи и орґанизациї прето же финансийно, и з адекватну потримовку у каждим смислу, технїчну, фахову, инфраструктурну и кажду другу, вельо лєгчейше порихтац єден таки Фестивал, алє и отримац його уровень, квалитет и препознатлїву форму котру „Ружова заградка” трима и чува уж вецей як 15 роки.
Кажди рок, починаюци од януара, чувствує ше окремна, позитивна енерґия медзи численима дїловнима єдинками у нашей Хижи, котри провадзаци орґанизацийни елемент у пририхтованю Фестивала. Велї заняти, коло 300 особи з нашей РТВ, уключени до його реализациї фестивалу, алє, вшелїяк, „Ружовей заградки” би нє було без композиторох, текстописательох, аранжерох и интерперетаторох.
Озда кажде хто у нашей музики цошка значи, лєбо ище лєм почал будовац свойо мено, уж участвовал на „Ружовей заградки” лєбо и далєй участвує и з рока на рок єй доприноши. Алє, на Фестивалу ше зоз своїма творами зявюю и авторе котри нє зоз нашей националней заєднїци, цо нам окреме мило. Велї з нїх у медзичаше розвили автентичне чувство за нашу музику и шпиванку, влапели єй дух и нїтку.
Тото цо окреме жадам наглашиц, то значенє „Ружовей заградки” за руску шпиванку, и вообще културу Руснацох, нє погриши ше кед ше пове же то роками найквалитетнєйши наш Фестивал, а особнє ше наздавам ше же и убудуце будзе моци отримац го и розвивац.
Юювилейне, 30. виданє „Ружовей заградки” ше отримує под мотом „На младих швет остава”. З тим порученьом сцеме указац же єст младих креативних людзох котри ше, кед раз станю на бину Студия „М”, кед виду пред публику, вше дзечнє одволую надалєй, поставаю состойна часц Фестивала, а нєраз и його ношителє. То єдини способ же би исти тоти млади особи видзели як ше учи шпивац нова шпиванка у провадзеню професийних оркестрох, як ше професийно знїма у студию и, на концу, як випатра кед зоз нашей продукциї останє тирваци музични запис на ношачу звука и наступ на концертним вечаре. Свидоми зме же єст и тих котри критикую Фестивал, алє ми их дзечнє поволуєме на сотруднїцтво зоз своїма идеями и креативносцу, бо дзвери Рускей редакциї Радия шицким отворени.
Вшелїяк, жадам визначиц же сом радосна же сала Студия „М” вше полна, же маме вирну публику котра нас провадзи кажди рок и з тей нагоди им дзекуєм и поволуєм на нове друженє. По наших рахункох, през тоти 30 роки фестивал у Студию „М” Радио Нового Саду нащивели вецей як 12 000 людзе. Окреме визначуєм же за тот фестивал найзначнєйше сотруднїцтво медзи музичну продукцию, музичну редакцию и рускима редакциями РТВ.
Медзитим, „Ружова заградка” би нє була така без наших вельочислених спонзорох котри нас потримовали и у чежких часох, а потримую нас и нєшка, бо дзекуюци праве им, Фестивал ше после музичней часци предлужує у голу Студия „М” на нєзаобиходним друженю. Так „Ружова заградка” постала и место сходзеня наших людзох зоз рижних бокох, од хторих ше велї праве ту, голєм раз до рока стретню, видза и наприповедаю медзи собу.
Тогорочна „Ружова заградка” будзе на нєдзелю, 1. марца, у Студию „М” Радио Нового Саду. Фестивал почнє з отвераньом вистави на 19,30, а на 20 годзин почнє його музична часц. Поволуєм шицких любительох новей рускей народней шпиванки же би и того року були з нами и преславели наш 30. родзени дзень.
Становиска висловени у тим тексту виключно авторово и нє вше одражую ушорйовацку политику новинох „Руске слово”.