ПАНЧЕВО – Зоз святочну програму у Културним центру у Панчеве НВУ „Либертатеа“ 27. мая означела седем децениї роботи. У мено тей установи, хтора од 1945. року нєпреривно обявює тижньовнїк на румунским язику, як и часописи за дзеци, младих и литературу, бешедовали директор Нику Чобану и одвичательна редакторка Теодора Смилян. Вони подзековали шицким, хтори през децениї оможлївели континуоване виходзенє публикацийох тей информативней хижи. Ювилей бул и нагода же би директор тей установи подзелєл награди тим хтори у предходних деценийох дали значне доприношенє друкованому информованю на румунским язику у Сербиї.
Ювилей у мено снователя повинчовал предсидатель Националного совиту румунскей националней меншини Даниєл Петрович, а у мено финансиєра, Покраїнского секретарияту за културу и явне информованє, помоцнїк секретара Смиля Максимович. Припознанє сцигло и од фаху – предсидателька Здруженя новинарох Сербиї Лїляна Смайлович гварела же мало єст информативни хижи у Сербиї хтори можу означиц 70 роки роботи.
Новинско-видавательна установа „Либертатеа” дала вельке доприношенє новинарству, публицистики и вкупней култури румунскей националней меншини у Сербиї, як и богаценю културних вредносцох на просторох Войводини. Тижньово новини „Либертатеа” були и остали у функциї благочасового, правдивого и подполного информованя припаднїкох румунскей националней меншини на мацеринским язику, як и у функциї очуваня язика, традициї, култури и румунскей духовносци на тих просторох – гварене на святочней академиї.
У рамику хижи и видавательна дїялносц хтора од 1945. року потераз видала вецей як тисяч наслови. То насампредз дїла авторох зоз тих просторох хтори пишу на румунским язику. Углядна публикация тей информативней хижи часопис за литературу, уметносц и културу Lumina (Шветлосц). Од 1947. року часопис афирмує розвой културних вредносцох, а окреме пестованє автентичних талантох. Часопис за дзеци „Bucuria copiilor“ (Дзецинска радосц) виходзи нєпреривно од 1946. року, наменєни є дзецом и вяза є „Либерататеи” зоз школами у хторих ше учи румунски язик. Од 1959. року НВУ „Либертатеа“ орґанизує єдинствену спортску манифестацию КУП „Либертатеа“, хтора зазберує вельке число спортистох и пестує складни медзинационални одношеня, змагательни дух и толеранцию.
