Вифлеємски огень сцигол до Сербиї

автор тах/мгк/маф
1k Опатрене

КОЦУР/НОВИ САД/ /РУСКИ КЕРЕСТУР – До наших парохийох вчера, 16. децембра, сцигол Вифлеємски огень мира, хтори принєсли скаути зоз Скаутскей орґанизациї „Пластуни” зоз Закарпатя у України.

Огень перше принєшени до Коцура, до Манастиру шестрох служебнїцох, дзе є виложени у каплїчки, одкаль го кажде годзен превжац и однєсц до свойого обисца. З нагоди сторочнїци їх орґанизациї, скаути настоятельки ш. Михаили Воротняк подаровали скаутску значку.

З Коцура огень потим сцигол до Нового Саду, до просторийох НВУ „Руске слово”, а  скаутох провадзел керестурски капелан о. Михайло Шанта. Пред тим, скаути з огньом нащивели и новосадски УКЦ „Кобзар”.

Вифлиємски огень вчера принєшєни и запалєни и у Катедралней церкви св. оца Миколая у Руским Керестуре, по Вечаршей Служби Божей.

Ношительох Вифлеємского огня, скаутох „Пластунох” з України у Керестуре  привитал домашнї капелан о. Михайло Шанта, котри потолковал їх мисию ношеня огня по жемох Европи. У мено „Пластунох” Андрий Ребрик присутним вирним пожадал же би им Вифлеємски огень, хтори однєшу до своїх домох и запаля на Вилїю, принєсол любов, мир и радосц Рождества до каждей фамелиї.

Числени вирни потим запалєли свойо швички з Вифлеємского огня и однєсли их до своїх обисцох, а швичку з огня годно запалїц на богослуженьох у церкви кажди дзень по Крачун.

Вифлеємски огень скаути з України до Сербиї приноша штварти рок.

ПОВЯЗАНИ ТЕКСТИ