НОВИ САД – Пред читачами нове, априлске число нашого часопису за дзеци „Заградка”, на чиїм рамику ґлумци з Дюрдьова и Нового Саду хтори того тижня зоз своїма представами участвовали на Драмским мемориялє у Руским Керестуре. Ту и фотоґрафиї малих „цицибанох” на Бамби-фесту, а тим двом културним подїйом пошвецени и цали други бок „Заградки”.
Литературна часц богата з писнями и приповедками наших авторох – Силвестера Саламона, Янка Раца, Серафини Макаї, Меланиї Павлович, та госцох – Райка Лукача, Веселина Миличевича, Душана Поп Дюрдєва и других. З драмску сличку „Климатски хора планета” часопис означує Дзень планети Жеми.
Духовни бок пошвецени Велькей ноци, а у додатку за наймладших „Мала заградка” даскельо руски народни писнї за дзеци и єдна писня о яри поети Якима Олеяра.
Литературни состави и малюнки за тото число „Заградки” послали школяре з Руского Керестура, Коцура, Нового Саду, Ґосподїнцох, Дюрдьова и Кули.
У Школи у Ґосподїнцох отримани Саям гортикултури и проєкту „За чистейши и желєнши школи у Войводини”, та бок „Здрави дух” пошвецени тей подїї, а у рубрики ”Вериш? Нє вериш?” представени даскельо войводянски музеї. У тим чишлє часопису обявени и Наградни конкурс за Смотру славянскей писменосци у Тителю.