СВИДНЇК (СЛОВАЦКА) – Як информує Општинска орґанизациї Русинскей оброди Словацкей у Свиднїку, а преноши панрусински тижньовнїк „Лем.фм плус”, тих дньох обявена кнїжка о визначним музичарови, композиторови, хореоґрафови и фолклористови Русинох у восточней Словацкей Юрийови Цимборови, познатому и Руснацом на тих просторох. Автор кнїжки, з назву „Юрко Цимбора”, тиж познати русински етноґраф Ян Калиняк, а єй промоция будзе у Свиднїку 27. септембра.
Юрий Цимбора народзени 1919. року у Свиднїку, умар 1989. року у Прешове; по законченю Грекокатолїцкей русийскей учительскей семинариї у Прешове перше робел як учитель и наставнїк у основних и штреднїх школох, а после дошколовйованя на студийох хорского шпиву и дириґованя у Братислави, од 1958. року робел у тедишнїм Поддуклянским українским народним ансамблу (ПУНА) у Прешове як руководитель хору, та як драматурґ и уметнїцки директор ансамблу. Автор є музики за велї хореоґрафиї, музичних творох, бул добри познатаватель русинского фолклору и народних шпиванкох, хтори и записовал, та за собу зохабел и даскельо зборнїки обробених народних шпиванкох.
Його композициї шпивали и Руснаци у тедишнєй Югославиї, а од 1970. по 1979. рок компоновал шпиванки и на тексти наших писательох хтори виводзени на „Червеней ружи” и „Червеним пупчу” (аж 12 за дзеци), а найпознатша з нїх и нєшка шпивана и слухана композиция у народним духу „О, врац ше, мили, врац”, на текст Михала Ковача, у виводзеню Ксениї (Няради) Рац.