НОВИ САД – Марцовске число „Заградки” зоз змистом, илустрациями и рисунками привитує яр. На рамику фотоґрафиї зоз Стретнуца виронаучних дзецох з Руского Керестура и Нового Саду, з Осмомарцовскей програми у КПД „Карпати” у Вербаше и Дня мацеринского язика у Беоґрадзе, док о тих подїйох „Заградка” пише на 18. и 19. боку.
Стихи за тото число написали Ирина Гарди Ковачевич, Тамара Хрин, Михайло Ковач, Мелания Павлович и Ана Тамаш, а приповедки Микола Скубан и Серафина Макаї. Драмску сличку о залюбених хлапцох подписує Владимир Андрич, а „Заградка” пише и о писательки Ясминка Петрович, добитнїци Награди „Мирослав Антич” за найлєпшу кнїжку за дзеци и приноши виривок з наградзеней кнїжки „Лєто кед сом ше научела лєциц”.
У рубрики „2000 роки християнства” представена Свята тайна супружества и интересантна Вельконоцна приповедка, а штири боки за школярски роботи виполнєли литературни состави и рисунки сотруднїкох з Руского Керестура, Коцура, Вербасу, Дюрдьова, Нового Саду и Бикич Долу.