НОВИ САД – Октоберске число нашого часопису за дзеци „Заградка” у знаку манифестациї дзецох „Червене пупче” на тогорочним Фестивалє рускей култури „Червена ружа”, так же фотография на насловним боку ище раз здогадує на побиднїцку композицию на „Пупчу”, а цали 18. и 19. бок пошвецени тому дзецинскому швету.
У рубрики „Фото памятки” мож дознац як означени Дзецински тидзень у Руским Керестуре, Коцуре и Дюрдьове, а у литературней часци и прикарпатска народна приповедка „Шалєни дава, мудри бере”, два драмски слички у стихох за читанє по улогох, та писнї Василя Мудрого и Серафини Макаї.
„Заградка” представя и нову кнїжку кратких приповедкох за наймладших читачох „Гайзибан на шпарґу” Меланиї Римар, и єдну приповедку о цмоти писателя Божидара Пешева.
У „Малей заградки” богато илустровани писнї и приповедки, як и рисунки предшколских дзецох з Коцура и Дюрдьова, док школярски литературни и подобово роботи виполнєли цали штири боки. За розвагу у „Заградки” два забавни и єден бок интересантносцох зоз швета.