РУСКИ КЕРЕСТУР – Пред Крачуном по григориянским календаре вишло децемберске, тогорочне остатнє число Християнского часопису „Дзвони”.
Нови „Дзвони” з найвекшей часци пошвецени швету Родзеня Христового – Крачуну, та обявена и крачунска винчованка нашого владики Георгия, по руски и по українски.
У „Дзвонох” и подробни звит о отвераню Святого року у Риме 8. децембра, а о Року милосердия, одн. о полним одпусту, „Дзвони” пишу и у додатку „Богословска думка”, дзе и преглїбенє Споведзи.
З церковней историї „Дзвони” приноша обсяжну биоґрафию митрополита Андрия Шептицкого з нагоди 150-рочнїци його народзеня, а у рубрики „Преглїбйованя” потолкована подїя Непорочного зачаца Богородици.
У нових „Дзвонох” и звити з актуалних подїйох у нашей и вселенскей Церкви, як цо то означованє 20-рочнїци Каритасу на тих просторох, як и стаємна рубрика за дзеци „Дзвончки”, тиж пошвецена Крачуну.