РУСКИ КЕРЕСТУР – Новемберске, 11. число християнского часопису „Дзвони” вишло прешлей нєдзелї у керестурскей парохиї св. оца Миколая.
У рубрики „Духовне заренко” актуална тема Крачунски пост, док актуални подїї тероризму у Европи з духовного боку спатрени у рубрики „Стереотипи”. У „Слове живота” преглїбене євангелске виреченє „Приготуйце драгу Господню, вировнайце му дражки”, дзе и „Шведоченє” о сили евхаристиї.
Окремни прилоги пошвецени „Молитви”, „Нєдзелї Каритасу”, „Диялоґу”, актуалносцом у Церкви, а у „Дзвонох” представени и Вокални квартет наших священїкох, односно їх компакт-диск „Керестурски штири дзвони”.
У нових „Дзвонох” и звити з подїйох у наших парохийох, здогадованє на нєдавно упокоєного о. Йоакима Дудаша, та некролоґ за парохияна Сримскей Митровици Теодора-Тошу Ференца.
У додатку „Богословска думка” друге предлуженє о Ювилейним – Святим року и евхаристиї.