РУСКИ КЕРЕСТУР – По лєтнєй павзи, у парохиї св. Оца Миколая у Руским Керестуре вишло двочисло Християнского часопису „Дзвони” (7-8).
„Дзвони” з векшей часци пошвецени нєдавно означеним двом вельким ювилейом у Коцуре – 250-рочнїци грекокатолїцкей церкви и 100-рочнїци приходу шестрох служебнїцох до того места. У „Духовним заренку” тей подїї призначена часц казанї владики Георгия з Архиєрейскей Служби Божей, ту и звити з рижних сеґментох означованя ювилейох, та статя о живоце шестрох служебнїцох.
„Дзвони” у рубрики „Стереотипи” приноша статю о значеню старих фотоґрафийох, а у „Слову живота” потолковане „златне правило” зоз шведоченями християнского живота.
Ту и актуелносци зоз вселенскей Церкви, дзевяте предлуженє напису о историї и сучасносци Каритасу (на тот завод у Руским Керестуре и Коцуре). Читачом понукнути и статя о духовней библиотеки у керестурским Каритасу, як и дожице єдного Керестурца з паломнїцтва у Сеґедину.
На бокох за младих напис о медзинародним проєкту младих з мир у Нємецкей, дзе участвовали и млади з Нового Саду, а „Дзвони” приноша и звити зоз шицких духовних подїйох и стретнуцох у наших крайох.