РУСКИ КЕРЕСТУР – Друге тогорочне число Християнского часопису „Дзвони” вишло прешлей нєдзелї у парохиї св. оца Миколая у Руским Керестуре.
Як стої у толкованю редактора о. Михайла Малацка, тото число вишло дзекуюци предплатом з Керестура и Нового Саду, та другим поєдинєчним донацийом, гоч дальше виходзенє часопису условене з финансиями, хтори нєдоставаю.
Нови „Дзвони” з найвекшей часци пошвецени периоду посту „як борби процив ровнодушносци”, цо наглашел папа Францизко, та духовному пририхтованю за наиходзаце швето Воскресеня – Пасху.
У рубрики „Стереотипи” текст з насловом „Вира наша и права”, а у „Сримских дожицох” статя о вше частейшим зявеню хторе наволане „Вирски микс”. Ту и текст пошвецени духовним поволаньом.
Рубрика „20 роки Каритасу” пише о „Шлїдами предкох прадїдовскей вири”, рубрика „Актуалне” приноши вибор з актуалносцох у вселенскей церкви, а вецей тексти приноша шведоченя вирних о моци вири у каждодньовим живоце.
У нових „Дзвонох” и висти зоз живота по наших парохийох, а у рубрики „Литература” обявена приповедка „Вайс мен” Славомира Олеяра з Канади.
У додатку „Богословска думка” 20. предлуженє „Значних моментох у Євангелиї” преглїбює Церву як св. Тайну, а ту и предлуженє рубрики „Упознай свой обряд”.