Вишло децемберске число „Заградки”

автор рим
727 Опатрене

НОВИ САД – За конєц першого полроча, а пред крачунскима и новорочнима шветами, школяре тих дньох достали децемберску „Заградку”.

Фотоґрафиї на насловним боку читачох здогадню на „Костельникову єшень” и єй литературне стретнуце школярох и писательох у Коцуре, як и на означованє 70- рочнїци КУД „Тарас Шевченко” у Дюрдьове, дзе участвовали и наймладши танєчнїки.

У рубрики „Фото памятки” часц учашнїкох на „Червеним пупчу”, а „Заградка” зазначела и збуваня на Медзинародним фестивалє за дзеци „Коритка у белавим”, на хторим по руски шпивали два єй сотруднїци.

У литературней часци вибрани стихи и приповедки о Дїдови Мразови, Крачуну и новорочней атмосфери писательох Миколи Скубана, Силвестера Макая, Миколи М. Кочиша, Мариї С. Горняк, Меланиї Римар и Тамари Хрин, а у рубрики „Облачок до швета” представени Деян Алексич – добитнїк тогорочней награди Змайових дзецинских бавискох за найлєпши роман рока за дзеци и младих.

Коло писньочкох и краткей приповедки, у додатку за наймладших и даскельо илустрациї за фарбенє, а о Стретнуцу рецитаторох у Кули пише на 19. боку, дзе и вистка о годзинох пестованя руского язика за наймладших у Новим Садзе.

Того мешаца до Редакциї сцигли аж 250 школярски литературни и подобово роботи, та на штирох бокох „Заградки” обявена лєм єдна часц найкрасших составох и рисункох.

Пред Националним шветом Руснацох „Заградка” розписал наградни конкурс за школярски подобово роботи, о чим вецей на 22. боку часопису.

ПОВЯЗАНИ ТЕКСТИ