НОВИ САД – Новемберске число часопису за дзеци „Заградка” своїм читачом приноши вельо стихи о єшенї, хтори написали нашо поетове Михайло Ковач, Микола Скубан, Михал Симунович и Микола М. Кочиш.
У рубрики „Облачок до швета” представена нова кнїжка Серафини Макайовей „Злагода”, а ту и драмска сличка о. Михайла Режака, з хтору дзеци нєодлуга годни привитац св. Миколая. Зоз сербского язика прешпивани даскельо писнї и преложени два кратки приповедки.
У „Малей заградки”, окрем писньочкох, єст и нєдофарбени илустрациї, нароком охабени же би их наймладши дзеци подофарбйовали.
Зоз школярского живота у „Заградки” вистки о настави руского язика з Новим Садзе и Ґосподїнцох, а цали 18. бок пошвецени манифестациї дзецох „Червене пупче” на Фестивалє рускей култури „Червена ружа”.
У рубрики „Здрави дух” представени спорти за шмелих – пендранє по стинох и по водопадох, а на „Забавних бокох”, як и у каждим чишлє часопису, єст гумору, скриваци виреченя, лавиринт, ребуси и ище койцо за бистрооких.