НОВИ САД – Децемберске число часопису МАК вишло вчера, а „У фокусу” му тогорочна „Дньовка”, потим розгварка з членом студентскей орґанизациї EESTEC Кристианом Монаром з Керестура, як и промоция мастер роботи Ани Римар з Петроварадину.
У рубрики „Спорт и рекреация” у МАК-у интервю з фодбалерку „Червеней гвизди” Мирелу Тенков з Коцура, „Швет технїки и технолоґиї” пише о других бокох интернету и о преширеней стварносци, а у рубрики „Упознай себе” текст о стилох комуникациї.
О богатстве знаня вецей язикох за МАК-ову рубрику „Куцик совитох” бешедує дипломовани филолоґ-романиста Вира Киш з Нового Саду, док рубрика „Направ сам” дава рецепт за капущанїки, а „Власни печац” представя Михаила Рамача з Дюрдьова, хторому гоби фотоґрафия.
Хто ше у идуцим, 2017. року жада предплациц на МАК и кажди мешац го доставац на домашню адресу, най пошлє свойо мено, презвиско и адресу на mak.magazine@gmail.com, лєбо поруку на Фейсбук бок – MAK MAGAZINE. Рочна предплата на МАК 1 000 динари.