БЕОҐРАД – У Влади Сербиї вчера отримана треца схадзка Совиту за национални меншини, хтору отворела подпредсидателька Влади и министерка державней управи и локалней самоуправи Кори Удовички, котра и заменїк предсидателя Совиту за национални меншини на уровню держави. Як вчера сообщене з Влади Сербиї, Удовички виражела задовольство же витворени континуовани диялоґ Влади и националних совитох (НС) националних меншинох на найвисшим уровню.
На схадзки присуствовали представителє шицких НС-ох меншинох у Сербиї, як и представителе компетентних министерствох, а спред Националного совиту Руснацох на вчерайшей схадзки присуствовал предсидатель Вивершного одбору НС Желько Ковач.
Як гварела заменїца предсидателя Совиту за национални меншини, и попри тим же медзи двома схадзками отримани сходи представительох Координациї НС-ох и министерствох просвити, култури и информованя, вонкашнїх дїлох, державней управи и локалней самоуправи, та Канцелариї за людски и меншински права на хторих ришени велї питаня, дзепоєдни и надалєй остали отворени.
Так на вчерайшей схадзки бешедоване о учебнїкох на язикох меншинох, приватизациї медийох и о роботи медзивладових мишаних целох.
– Свидоми зме же єст проблеми хтори мож ришовац швидше, алє и далєй маме одредзене число питаньох хтори вимагаю полну пошвеценосц и медзисобне порозуменє и довириє – гварела Кори Удовички и предложела же би ше, пре ришованє отворених питаньох, у шлїдуюцих тижньох отримало окремни роботни схадзки.
Як сообщене з Кабинету Влади, представителє НС-ох похвалєли порядни диялоґ хторио маю з Владу, алє наглашели же би и ресорни министерства требали буц ажурнєйши у одвитованю на питаня совитох.
Министер правди Никола Селакович на вчерайшей схадзки визначел же Нарис акцийного плану за унапредзенє положеня националних меншинох на явних консултацийох и поволал НС-и же би дали свойо суґестиї и коментари на Нарис.
Селакович, як поведзене у сообщеню, наявел и же штредком того мешаца будзе отримана схадзка Роботней ґрупи хтора виробела спомнути акт и на нєй буду розпатрени шицки суґестиї дати у явних консултацийох.
Помоцнїк министра просвити Милован Шуваков гварел же уж постої информацийна система хтору ше розвива и хтора одвитує на питаня представительох НС-ох. Тиж наглашел же пририхтана поволанка за учебнїки на язикох меншинох пре обезпечованє шицких хтори нєдоставаю, а обчекує же у децембру почнє реализованє тей поволанки.
Кед слово о приватизациї медийох, державни секретар у Министерстве култури и явного информованя Саша Миркович на вчерайшей схадзки Совиту гварел же витворени барз добри резултат, понеже 36 медиї предати на аукциї, як и же окончени розгварки з Радио-телевизию Сербиї и Радио-телевизию Войводини же би ше злєпшало програми на язикох националних меншинох у Сербиї, у складзе з постояцима законскима ришенями за явни интерес, односно зоз задовольованьом и потребох националних меншинох.