НОВИ САД – Всоботу, 22. октобра, у Новим Садзе отримана заєднїцка схадзка Републичней и Покраїнскей влади, чийо члени розпатрали вецей як 20 точки дньового шору. Акцент бул на финансованю и витворйованю проєктох значних за шицки 45 локални самоуправи у Войводини и за финансованє Войводини. Премиєр Сербиї Александар Вучич после схадзки гварел же принєшени и одлуки о даскельо проєктох чийо витворйованє почнє такой.
– Уж нєшка зме преруцели перши два милиони еври за транспортну драгу „Ипсилон крак“, хтора барз значна за цалу Суботицу, а окреме за индустрийну зону. Новому Саду зме преруцели часц пенєжу за ушоренє централних часцох городу, як часц пририхтованя за Европску престолнїцу култури. Ґу тому, у републичним буджету за 2017. рок будземе плановац и штири милиони еври за нови будинок РТВ – гварел Вучич.
Шлїдом вимоги Покраїнскей влади же би ше обезпечело 147 милиони динари за 26 школи и дзецински заградки, Вучич наявел же з републичного буджету до обєктох у образованю буду уложени 1,9 милиярди динари.
Як поведзене по схадзки, затераз нєт нагадованя кеди будзе принєшени закон о финансованю Войводини, алє ше на схадзки бешедовало о системским ришованю пропорцийней учасци Войводини, а премиєр Вучич визначел же 55,6 милиярди у покраїнским буджету праве коло седем одсто з розходох републичного буджету.
Средства буду видвоєни и за вибудов 37 километерох фрушкогорского коридору, за законченє Народного театру у Суботици и за векшу учасц у финансованю институцийох националних меншинох.
Покраїнски премиєр Иґор Мирович визначел же Покраїнска влада достала моцну потримовку Републичней влади, а то ґарантує же годно поробиц и вецей як цо Покраїнска влада заплановала на початку мандату.
– Прешвечени сом же у шицких 20 обласцох о хторих зме бешедовали витвориме конкретни резултати. Задлужели зме покраїнских секретарох, а премиєр Вучич своїх сотруднїкох, най вєдно робя на витворйованю тих значних проєктох – гварел Иґор Мирович по заєднїцкей схадзки двох владох.