Владика Георгий: Исусово Воскресенє – то фундамент християнства

автор рсл
975 Опатрене

АПОСТОЛСКИ ЕҐЗАРХАТ – Вира до Воскреснутого Исуса – то найвекши скарб котри ма кажди чловек, особлїво християн. Исусово Воскресенє – то фундамент християнства. Буц християн значи вериц же Исус – Єдинородни Син Божи, церпел, бул розопяти, умар и воскреснул з мертвих; зоз своїм Воскресеньом победзел шмерц, а нам отворел уход до живота вичного.

Же бизме зачували тот наш християнски идентитет, нєшка требаме, баржей як гоч кеди, положиц до штредзиска свойого живота праве виру до Воскреснутого. Славяци Христово Воскресенє, ми виражуєме виру и надїю до нашого власного воскресеня. То вира побиди вичного живота над шмерцу, вира побиди шветла над цмоту, любови над мержню, побида радосци над смутком. З того виходзи же наша каждодньовосц, нашо болї и церпеня – то нє законченє, алє преход до радосци. Радуйме ше, бо наш живот достал нови смисел праве у Христовим живоце, у Його шмерци и Воскресеню! Радуйме ше, бо радосц – то фундаментална ознака християнского живота!

Кед би Исус нє воскреснул, швет би бул у гаосу. Ми вериме же Дух Исуса Христа може стаємно меняц швет и меня го. И праве ми тоти од котрих завиши чи Воскресенє пременї швет у яким жиєме, чи воно постанє дїйсносц нашого живота. Кед ше будземе прилагодзовац швету, його способу думаня и дїлованя, шветовим трендом и його идеалом, и кед Бог у наших животох нє завежнє тото место, котре му припада, вец швет нє прилапи анї християнство, анї нас.

Будзме Исусов квас, глєдайме лєм Його славу, а нє нашу; будзме сотруднїки Исусового дїла котре Вон жада прейґ Церкви витвориц у сучасним чаше! На тот способ наисце допринєшеме же би ше Воскресенє случело и нєшка, а Його моц ше виражела у нас и коло нас.

Будзме шветло Воскресеня, котре швици и ошвицує драгу каждому, подзельме го з другима, най ше воно видзи у наших ошмихох, у наших словох одшмелєня и дїлох любови, а нашо шведоченя най буду моцни ехо того цо за нас Бог зробел!

Винчуєм благословени швета Воскресеня Христового! Най буду благословени и значни нам и швету, дзекуюци нашим конкретним жицом и преживйованю подїї Воскресеня Христового!

Христос Воскрес! Воистину Воскрес!

Ваш владика

+ Георгий

Апостолски еґзарх

 

ПОВЯЗАНИ ТЕКСТИ