ПРЕШОВ (СЛОВАЦКА) – Ватиканска конґрегация за восточни церкви у Риме помоцного владику Прешовского грекокатолїцкого владичества и протосинкела др Милана Ляха 22. октобра меновала за визитатора-делеґата папских колеґийох и монашских семинарох восточних церквох у Риме, а нову функцию кир Лях будзе окончовац попри служби помоцного владики у спомнутим владичестве – пише портал русинФОРУМ.
За помоцного владику Прешовского грекокатолїцкого владичества папа Франциско кир Ляха меновал у априлу 2013. року , а до теди службовал як продекан за иножемни одношеня и за розвой на Теолоґийним факултету Трнавского универзитета у Братислави. На истим факултету робел и як продекан, дзе викладал християнску спиритуалносц и спиритуалносц християнского Востоку.
Владика Милан Лях народзени 18. новембра 1973. року у Кежмарку, 1995. року ступел до новицияту Исусовей заєднїци у Трнави, дзе по двох рокох зложел вичну пришагу. За священїка го 1. юлия 2001. року пошвецел терашнї кошицки епархиялни владика Милан Хаутура.
Од 2004. по 2006. рок студирал на Папским восточним институту у Риме, дзе здобул лиценцият з восточних церковних наукох, а 2009. року и докторат у истим фаху.
Окрем искуства з медзинародного академского штредку, здобул и искуство з духовней служби, як помагаюци спиритуал Папского колеґиюму „Русикум“ и як духовни асистент Федерациї скаутох Европи у Риме.