Числени вирни рускокерестурскей парохиї св. оца Миколая всоботу, 23. априла, преславели швето велїкомученїка Георгия – Дзуря, а найшветочнєйше було на шпиваней Служби Божей у Водици, дзе по Служби пошвецене жито. Пред Службу, парох керестурски о. Михайло Малацко окончел обряд отвераня дзверох Водицовей церкви, з чим вона, попри керестурскей Катедрали, як утвердзел наш владика Георгий, урядово постала одпустове место у Року милосердия.
Парох Малацко при тим наглашел же отверанє и преход през св. дзвери на вонкашнї способ помага вирним возбудзиц у себе чувство покаяня. Велї вихасновали нагоду и за одпустову св. споведз, а споведал капелан о. Михайло Шанта. Так преход през святи дзвери у духу покаяня, приступенє до св. тайнох Споведзи и Причасци и вимодлєни молитви за намиренє св. оца папи, вирним приноши подполни одпуст у Року милосердия и таки исти ласки яки ше з тей нагоди доставаю и за преход през святи дзвери у римскей базилики.
У казанї о. Малацко здогаднул на вельку шмелосц у шведоченю вири младого Георгия, официра римского войска хтори жил и страдал за виру до Исуса коло 300. року, у чаше велького прешлїдованя християнох. Тоту подїю вон повязал зоз тему Божого милосердия, понеже ше находзиме у тим св. Року, и заохоцел вирних же би були милосердни єдни ґу другим як цо и Бог милосердни ґу нам. На концу Служби, зоз обходом коло водицовей церкви пошвецене жито на штирох бокох швета, як молитва и подзекованє Господу за добри урожаї и плоди жеми.
У Водици то була перша Служба Божа у тим року, а богослуженя там буду на кажде швето по григориянским календаре аж до позней єшенї. За початок тогорочней „водицовей сезони”, Церковни одбор ше постарал же би ше доправело закрице и оградзенє на лєтнєй каплїци поза лєтного олтара. Як дознаваме, того надкрице кошта 100 000 динари. Вельку часц материялу, подаровало подприємство „Ява” зоз Вербасу, а часц обезпечена зоз водицового дзвончка. Роботу добродзечнє окончели майстор Дюра Надь и Янко Ковач, а поставиц го помогли члени Церковного одбору.
У ШВЕТОВЕЙ ЗАЄДНЇЦИ СВЯТИЛЇЩОХ
Парох Михайло Малацко присутних поинформовал же 17. мая, на Завитни дзень по григориянским календаре, у Водици будзе велька шветочносц з нагоди приманя Водици до шветовей заєднїци Марийових святилїщох Католїцкей Церкви, на чолє з церкву Мария Маджоре у Риме.
Вон поволал шицких же би 17. мая пришли на Службу Божу, хтора будзе на 11 годзин, а хтору з нашим владиком Георгийом будзе предводзиц папски нунций Лучияно Сурияни з Беоґраду и други владикове и священїки.