КОЦУР/ВЕРБАС – Понеже пре горучави хтори були остатнї днї Коцурци трошенє води звекшали за половку, як и гражданє цалей вербаскей општини, з Роботней єдинки „Водовод и канализация” ЯКП „Стандард” поволую же би ше воду з водоводу хасновало лєм за основни гиґиєнски и санитарни потреби, а нє и за залїванє.
Директор „Водоводу” Мирослав Фейса за Рутенпрес гварел же рестрикциї води у општини нє будзе, алє залїванє заградкох и заградох барз уплївує на реґулованє прициску води, та поволує же би ше воду рационално трошело.