ВОЙВОДИНА – Прешлого, 2014. року Войводину нащивели седем одсто вецей туристи у одношеню на 2013. рок и достала коло 30 одсто вецей пенєжу у девизох, указую найновши податки Републичного заводу за статистику. Зазначене и же до Войводини кажди рок приходзи вше векше число иножемних и домашнїх туристох, хтори найчастейше нащивюю Нови Сад и Суботицу.
Окрем тих городох, туристох прицагую и войводянски салаши, дзе можу коштовац традицийни єдла, потим Палицке озеро, Фрушка гора, купелї и велнес-центри. Войводянски атракциї нащивюю углавним госци зоз сушедних жемох, найвецей з Горватскей, Словениї, Босни и Герцеґовини, Мадярскей, алє и з Нємецкей.
Општини, поднїмателє и нєвладово орґанизациї хтори жадаю унапредзиц туристичне понукнуце и того року годни конкуровац за средства за софинансованє проєктох и програмох. Покраїнски секретар за привреду, обезпечованє роботи и ровноправносц полох Мирослав Васин наявел же за тоту намену у буджету АП Войводини обезпечени 130 милиони динари.