БЕОҐРАД – Вецей як 40 одсто општинох у Сербиї у републичним парламенту нє ма свойого представителя, цо значи же гражданє котри далєй од политичних и економских центрох нє буду ровномирно заступени, гварела представителька Националней коалициї за децентрализацию (НКД) Йована Страхинїч.
Анализа хтору окончела НКД указала же у новим зволаню Скупштини Сербиї Беоґрад ма аж 105 посланїкох, цо 42 одсто з цалого числа, а Войводина ма два раз менєй представительох, гоч ма вецей гражданох як Беоґрадски реґион, наведла Страхинїчова.
Други реґиони нє маю достаточне число посланїкох у Скупштини, та кед ше, поведзме, будзе розпатрац Закон о ровномирним реґионалним розвою, посланїки нє годни реално спатриц стан у реґионох и держави, наведла Страхинїчова.
НКД поручує же нєобходни механїзем по хторим би посланїки були повязани зоз штредком одкаль походза, чому би допринєсло векше число виберанкових єдинкох и пресонализация. Здогадла же у прешлим зволаню Скупштини формована роботна ґрупа за пременку политичней системи, алє отримане лєм єдно явне слуханє на хторим винєшени предкладаня политичних странкох.