НОВИ САД – Економски часопис „Файненшл Таймс” (The Financial Times) ранґовал 148 европски реґиони на основи стратеґиї прицагованя инвеститорох и на тей лїстини Войводина завжала високе седме место, гварел предсидатель Покраїнскей влади Боян Пайтич на вчерайшей конференциї за новинарох.
– Тото припознанє пошлїдок рижних мирох Влади Войводини хтори зме запровадзовали остатнї роки. Отверанє индустрийних зонох и едукативних центрох, вигодни кредитни линиї за инвеститорох, та рижни субвенциї за роботодавательох лєм даєдни з мирох з хторима зме до Войводини прицагли вецей як 40 инвеститорох з иножемства – виявел Пайтич.
Вон визначел же дотераз до Войводини уложени 7, 5 милиярди еври, у предходним периодзе заняти коло 70 000 особи, а Покраїнска влада и ВИП фонд витворели значни инвестициї хтори оможлївели отверанє фабрикох „Тиса Автомотив”, „Сваровски”, „Фрезениюс”, „Маґна”, „Калцедония”, „Ґрундфос”, „Лувата” и „Ханчинсон”.