РУСКИ КЕРЕСТУР – Цо то волонтеризем, у яких обласцох мож волонтирац, та яки хасен з нього ма заєднїца и сам волонтер, були даєдни з темох на вчерайшим преподаваню у просторийох керестурского интернату Школи „Петро Кузмяк“.
Представителє Волонтерского центру Войводини (ВЦВ) з Нового Саду штредньошколцом керестурскей Школи презентовали роботу тей орґанизациї и єй рижни роботнї и активносци. Найвецей бешедоване о медзинародних волонтерских кампох през лєто, за хтори ше уж мож приявйовац.
Конкретно и детально о волонтерских кампох бешедовал Иван Канюх, котри участвовал и водзел камп у Руским Керестуре. З тей нагоди вон поволал младих штредньошколцох же би ше приключели и на тот способ допринєсли заєднїци, а ґу тому, на хасновити способ виполнєли свой шлєбодни час, упознали нових людзох и рижни култури.