БЕОҐРАД – На вчерайшей конференциї за медиї министер привреди Синиша Мали представел явносци всеоблапни економски мири зменшованє неґативних ефектох пандемиї коронавирусу и потримовку привреди Сербиї.
Пакет мирох вредни 5,1 милиярди евра, осторожно є пририхтани, а у анализи спатрени шицки можлїви пошлїдки тей кризи за нашу економию, як и искуства других жемох.
Мали додал же у рамикох порцийней политики держава як потримовку привреди принєсла три мири, а котри знача же держава на себе превежнє трошок подприємствох у суми 1,3 милиярди евра.
Тоти мири подрозумюю: одкладанє плаценя порциї на заробки и доприноси за шицки приватни подприємства док тирва позарядови стан, а найменєй три мешаци, одкладанє плаценя порциї на добит за други квартал 2020. року и ошлєбодзованє од ПДВ за шицких котри донирую и занїмаю ше з донациями, преноши сайт Радио-телевизиї Войводини.