ЗРЕНЯНИН – З новим законом о финансийней потримовки фамелийом з дзецми перши раз предвидзене же власнїца польопривредного ґаздовства годна доставац положнїцке надополнєнє як и други жени, наявел министер за роботу, обезпечованє роботи, борецки и социялни питаня Александар Вулин нас всоботу отримани Сайме творчосци валалских женох у Зренянину.
Як гварел, наздава ше же закон до конца рока войдзе до явней розправи, же би идуцого року бул и прилапени у парламенту.
На Сайме творчосци валалских женох поведзене же у Сербиї 17 одсто женох власнїци польопривредних ґаздовствох, так же держава муши водзиц старосц о положеню женох на валалє.
– Валал зачувал Сербию, а кед дахто зачувал валал, вец то праве жена – гварел Вулин и коментаровал же ше, нажаль, жени на валалє нє можу похвалїц же маю исти приступ ґу здравственей защити, пензийному осиґураню, културним збуваньом, як тоти жени котри жию у городох, та на держави же би то пременєла.