Вулин: Без вас бизме були худобнєйши

автор мгк фото маз
1k Опатрене

БЕОҐРАД – З нагоди Медзинародного дня людских правох – 10. децембра, всоботу ше на Беоґрадским сайме представели 15 з 21-ней национални меншини у Сербиї хтори орґанизовани прейґ националних совитох. Представянє, з назву „Мозаїк Сербиї”, орґанизовали Канцелария за людски и меншински права Влади Републики Сербиї, у сотруднїцтве з националнима совитами националних меншинох, а наглашуюци же политика Сербиї спрам националних меншинох у складзе з найвисшима шветовима стандардами, манифестацию отворел министер за роботу, борецки и социялни питаня у Влади Сербиї Александар Вулин.

– Щиро сом горди з таким числом и одношенями медзи меншинами и людзми. Любиме кажду националну меншину, без вас бизме були худобнєйши и єднообразни – гварел на отвераню Манифестациї „Мозаїк Сербиї” министер Александар Вулин и наведол же ше у Сербиї на язикох меншинох видава 118 друковани медиї, з хторих 39 мишани, як и же ше на 76 ТВ-каналох емитує 8 000 програми, а на 103 радио-станїцох 11 000 годзини машечно програми на язикох националних меншинох.

Присутних привитала директорка Канцелариї за людски и меншински права Сузана Паунович, котра наглашела же Сербия зачувала мултикултруралносц.

– Трудзиме ше ришовац проблеми и унапредзовац положенє шицких меншинох. Вони мост за повязованє зоз сушедами и почитованє медзи народами. Мушиме и сцеме жиц вєдно, то нам циль – гварела Пауновичова.

То перши раз же у Сербиї Медзинародни дзень людских правох означени и з вельку манифестацию пошвецену припаднїком националних меншинох, хтори ше представели з културну програму, информативну, образовну и видавательну дїялносцу, як и зоз своїма националнима кухнями, народним облєчивом, старима ремеслами и другима змистами.

На бини, пред числену публику, спред Руснацох наступела Шпивацка ґрупа „Бикичанки” з Бикичу, у народним облєчиве, та Младша шпивацка ґрупа з КПД „Дюра Киш”зоз Шиду.

Попри на заєднїцкей културно-уметнїцкей програми, Руснаци на окремним штанду представени и прейґ виданьох НВУ „Руске слово” и Заводу за културу войводянских Руснацох, школяре и просвитни роботнїки на пригодни способ представели руску Ґимназию, односно Основну и штредню школу з домом школярох „Петро Кузмяк” з Руского Керестура, Здруженє женох „Бикичанки” з Бикичу пририхтало богати етно-стол з нашима традицийнима єдлами, а Здруженє женох „Байка” з Керестура викладало свойо виробки.

З нагоди Медзинародного дня людских правох и представяня националних меншинох на Беоґрадским сайме, популарна ТВ-емисия РТС „Жикина шареница” всоботу була пошвецена меншином и у нєй як перши представени Руснаци, зоз шпиванку хтору одшпивал Марко Радишич, з провадзеньом оркестру КУД „Тарас Шевченко” з Дюрдьова.

ПОВЯЗАНИ ТЕКСТИ