Вучич: Войводини 7,3 одсто

автор днв/зам
1.1k Опатрене

БЕОҐРАД – Як у розправи о новим буджету Републики Сербиї гварел премиєр Александар Вучич, з Предлогом буджету предвидзене же АП Войводина достанє 7,3 одсто приходох з державней каси, цо 67 милиярди 187 милиони динари, преноши вчерайши новосадски „Дневник” часци вязани и за Войводину у розправу о буджету, хтора тих дньох тирва у Народней скупштини.

На початку викладаня о буджету, предсидатель Влади РС гварел же то „найлєпше скрати, а реално скрати буджет хтори Сербия мала”, а кед слово о Войводини, наглашел же „ми видвоюєме 7,3 одсто наших приходох”.

– На уровню Покраїни нєт нїяки сущни обовязки, бо ми (з уровню Републики) плациме и пензиї, и плаци и драги и шицко… Ми даваме пенєжи же би Покраїна виплацовала покраїнским институцийом. Крем надополнєньох, нєт жридлово приходи – гварел Вучич.

Предочел же, попри наведзеней суми, дополнююцо буду видвоєни и 9 милиярди субвенциї за польопривреду, як и 465 милиони дин. за гранїчни преход Батровци, 300 милиони за Келебию, за проєкт мадярско-сербскей гайзибанскей драги 850 милиони, за вибудов нового гарешту у Панчеве 386 милиони, а 171 милион у складзе зоз Законом о социялней защити.

Премиєр одбил оцени лидера ЛСВ Ненада Чанка же буджет нєуставни, бо нє ма провадзаци закони з хторима би ше прецизовало обовязки держави спрам Войводини и додал же постоя ткв. „лекс специялиси”, з хторима одредзени жридлово приходи АПВ. У складзе з нїма Войводини остава 42,7 одсто з порциї на добиток подприємствох з єй териториї, 18 одсто з порциї на доходок, як и надополнєня за одводньованє, за лєси.

На питанє чи за горе спомнуте потребни єден верховни закон, гварел же о тим треба бешедовац, пописац шицки приходи Войводини, алє и обовязки Покраїни.

Премиєр Вучич виражел довириє до Покраїнскей влади же пенєж будзе мудро трошиц на важни проєкти у Войводини, а визначел и же Новому Саду опредзелени три милиони еври за ушоренє фасадох, понеже ше го трима за окремни туристични потенциял и же 2012. року будзе Европска престолнїца култури.

ПОВЯЗАНИ ТЕКСТИ