КОЦУР – З нагоди 23. Културней манифестациї „Костельникова єшень”, вчера у голу Дому култури у Коцуре отримана музично-литературна програма, хтору орґанизовали Дом култури Коцур, Месни одбор Рускей матки (МО РМ) Коцур, Етно-клуб „Одняте од забуца” и ОШ „Братство єдинство”.
На програми з вецей рецитациями и шпиванками участвовали школяре од першей по седму класу ОШ, котрих за тоту нагоду пририхтали їх учительки, наставнїца и библиотекарка. Читаюци його биоґрафию, на живот и роботу др Гавриїла Костельника здогаднуте и през конферансу.
На живот Гавриїла Костельника здогаднуте и прейґ словох владики бачкого Иринея, хтори пречитала предсидателька Етно-клубу Аранка Медєши. Медєшова на концу програми отворела и виставу малюнкох з тему „70-рочнїца колонизациї”, хтори настали на тогорочней Подобовей колониї „Коцур” у орґанизациї МО РМ.
На вчерайшей програми присуствовали и дзепоєдни члени Упраного одбору РМ, на чолє з єй предсидательом Дюром Папуґом.
Програма „Костельниковей єшенї” на ютре, 24. новебра, знова будзе у Коцуре, дзе у ОШ „Братство єдинство”, у присустве авторкох, буду представени найновши кнїжки за дзеци у виданю „Руского слова” – „Злагода” Серафини Макаї, „Гайзибан на шпарґу” Меланиї Римар и „Котульки и ґомбульки” Ирини Гарди Ковачевич.