Вчера и перша дзецинска представа – „На терапиї у Милеви”

автор маф
1.4k Опатрене

РУСКИ КЕРЕСТУР – На 48. Драмским мемориялє Петра Ризнича Дядї вчера одбавена и перша представа у пополадньовим терминє дзецинских представох – „На терапиї у Милеви”, авторки и режисерки Катарини Фейди, а у продукциї КПД „ДОК” з Коцура.

Гоч представа бавена за дзеци, єй тема баржей за одроснуту публику, або голєм за старши дзеци, бо обробела неґативне зявенє у швеце одроснутих – купованє дипломох, у тим случаю „дохторки психиятриї Милеви”.

Авторка Фейдийова пририхтала и сценоґрафию и музику, бавела и главну улогу Милеви, а попри нєй ґлумя ище Дарина Михняк, Силвия Маґоч, Наташа Тамаш и Єлена Чордаш. За костими у представи задлужена Анамария Тамаш, котра и суфлерка.

То було друге виводзенє тей представи у таким формату, понеже єй премиєра одбавена 17. априла у Коцуре.

Шицки учашнїки у дзецинских представох на Мемориялє од орґанизатора на дарунок доставаю кнїжку приповедкох и леґендох Ирини Гарди Ковачевич „Нєбо керестурске”, а спонзор кнїжкох НВУ „Руске слово”.

ПОВЯЗАНИ ТЕКСТИ