РУСКИ КЕРЕСТУР – Млади ґлумци з КУД „Тарас Шевченко” з Дюрдьова вчера на Мемориялє виведли дзецинску представу Мирослава Настасиєвича „Нєлапшни шаркань”, хтору режирал Яким Чапко, а преложела Блажена Хома Цветкович.
Єденацчлена ґлумецка екипа розличних ґенерацийох Керестурцом успишно представела приповедку о „змотаному” шарканьови котри ше бори з принцом за любов принцези. Гоч у тим дуелу траци, принцеза го на концу посанує и бере за свойого товариша, а млада керестурска публика гласно и з навияньом доживйовала и преживйовала збуваня на сцени.
У представи ґлумя Иван Хромиш, Иван Скубан, Єлена Мудри, Лука Кухар, Мария Горняк, Желяна Такач, Милица Михальовски, Аня Хромиш, Елеонора Винаї, Сима Михальовски и Мирослав Марянов.
Шицки учашнїки од орґанизатора на дарунок достали кнїжку приповедкох и леґендох Ирини Гарди Ковачевич „Нєбо керестурске”, хтору им обезпечела НВУ „Руске слово”.