ШИД – Вчера, 9. авґуста, у Шидзе почал семинар фолклору за хореоґрафох з наших културно-уметнїцких дружтвох. Семинар орґанизує Завод за културу войводянских Руснацох, а тирвац по соботу.
Хореоґраф Вилиям Микула и його асистентка Мирям Манїкова, обидвойо з ПУНА з Прешова, зоз Словацкей Републики, учашнїком семинара укажу нови хореоґрафиї и танци з восточней Словацкей – з обласцох Шариш, Земплин и Спиш.
Роботну часц семинара ше отримує у сали Руского дому, односно просторийох КПД ,,Дюра Киш”, а перши дзень були штверо учашнїки з Дюрдьова, тройо з Руского Керестура, по двойо зоз Шиду и Бикичу и єден з Нового Саду. Музични корепетитор на гармоники Мирон Сивч.
Змесценє, костиранє и ноцнїк за учашнїкох семинару обезпечени у Лєтнєй владическей резиденциї.
