БЕОҐРАД – У рамикох Манифестациї Днї рускей култури у Етноґрафским музею у Беоґрадзе вчера, 26. авґуста, представена Моноґрафия „Народне облєчиво бачванско-сримских Руснацох”, до хторого у програми були облєчени дюрдьовски аматере.
Бешедуюци о краткей историї Руснацох и значносци видатей Моноґрафиї, програму отворела Любица Отич, редакторка кнїжки. И єдна з авторох, мр Катарина Радисавлєвич, публики визначела дзепоєдни важни сеґменти, потим Маґдалена Надь з Дюрдьова у исти час облєкала жену и приказовала шицки часци облєчива, од обуї, по фитюлу. Вона и толковала як ше дакеди чесало власи, дзе ше куповало платно за сукню, дзе ше яку шмату ношело…
У програми участвовали члени КУД „Тарас Шевченко” з Дюрдьова котри були облєчени по кодексу з кнїжки и котри, виводзаци свойо точки, презентовали облєчиво, алє и Руски шпиванки и танци. Женска жридлова ґрупа шпивала у блишових пасових сукньох з хусточками на глави, члени виводзацкей фолклорней ґрупи и Дзивоцкей шпивацей ґрупи танцовали и шпивали у папланових сукньох, з варґочом и баршоньом на глави. Хлопи котри шпивали, танцовали и грали були облєчени до святочних шматох – чарних надраґох, билей кошулї, лайбика, калапа, чижмох або ципелох.
После програми присутни послужени зоз традицийнима єдлами котри пририхтали жени зоз Жридловей ґрупи, а котри дзечнє зоз присутнима бешедовали о рецепту шицких лакоткох и сланих старих народних печивох.
То була предостатня програма Манифестациї котру орґанизує Завод за културу войводянских Руснацох, а котра будзе тирвац до 28. авґуста.