Вчера у Коцуре означене Националне швето Руснацох

автор злк
1.2k Опатрене

КОЦУР – Вчера, 18. януара, у коцурским Руским доме, у орґанизациї Подручней канцелариї Националного совиту Руснацох у Коцуре и КУД „Жатва” зоз пригодну програму означене Националне швето Руснацох.

Шветочносц почала на 18 годзин, кед Микола Шанта, координатор Подручней канцелариї у Коцуре, привитал шицких госцох.

У програми участвовали школяре нїзших класох Основней школи „Братство єдинство”, хтори зоз учительку Славицу Чельовски пририхтали рецитациї, писнї и танєчни точки.

Марко Буила и школярки осмей класи, Катарина Кулич и Наташа Тамаш, хторих на гармоники провадзел Любомир Сакач Андри, одшпивали даскельо руски писнї. Силвия Маґоч пречитала пригодну бешеду о руснацтве у Коцуре и цо за наш народ у каждодньовим живоце значи буц Руснак або Рускиня.

Означиц Дзень Руснацох пришли велї Коцурци, та сала Руского дому була полна.

Од визначних особох у просторийох Руского дому були предсидатель Општини Вербас Милан Ґлушац, заменїк предсидателя Општини Миляна Штулич, предсидатель Совиту МЗ Коцур Желько Бєлан, директорка Школи у Коцуре Славица Байор, як и члени Националного совиту Руснацох Весна Раґаї-Цап, Стеван Самочета и Михайло Киш.

Официйна програма закончена зоз шветочну писню Руснацох, а потим предлужене друженє  на пририхтаним коктелу дзе шицки присутни уживали у музики и друженю.

ПОВЯЗАНИ ТЕКСТИ