СЕРБИЯ – Кажди штварти полнолїтни, односно коло милион и пол гражданох Сербиї члени даєдней з 96 политичних странкох, пише аґенция Бета. Людзе ше найчастейше уписую до Сербскей напредней странки (СНС), а по податкох з тей странки, вона тераз ма 497 000 членох.
Друга по числу членох то Демократска странка (ДС), чийо партийни кнїжочки маю коло 200 000 особи. По словох секретара ДС Милана Поповича, под час кризи у странки велї ше з нєй виписали, алє ше прилючели нови члени.
Приблїжне число членох маю Єдинствена Сербия (ЄС) – 104 000, Партия зєдинєних пензионерох Сербиї (ПУПС) 100 000 и Нова Сербия (НС) 95 000. Либерално-демократска странка (ЛДП) ма 70 000, Социялистична партия Сербиї (СПС) ма 65 000, а Нова демократска странка (НДС) 35 000 членох.
Нє шицки странки маю прецизни податки, а представителє вецей странкох гварели же нє знаю чи их члени маю по вецей партийни кнїжочки, цо цалком можлїве, преноша новини „Вечернї новосци“.