НОВИ САД – Новинарка-редакторка у „Руским слове” Славица Фейса тих дньох була у центре уваги векшини дньових писаних и електронских медийох пре свой гумани ґест, понеже пияток, 21. октобра дополадня нашла лєм цо народзене дзецко, хлапчика, котре єдна жена у платновей цмо-белавей ташки зохабела у дворе новосадского породзилїша „Бетания”, и однєсла го до породзилїща. Пре тот чловечески ґест наисце заслужела похвали явносци, єдна з нїх и же ю дньово новини „Блиц” пондзелок, 24. октобра преглашели за Побиднїка у своєй порядней рубрики „Побиднїк”.
Фейсова часто преходзи коло „Бетаниї” и як гварела за Рутенпрес, чула бебов плач, отворела ташку и видзела же дзецко праве народзене, без шматох. Же нє прешло вельо од часу його народзеня потвердзела и дохторка у „Бетаниї.
– Вжала сом дзецко, перше отворела дзвери од тамтейшого бутику дзецинскей опреми и скричала най ми дахто помогнє. Власнїк бутику Бранислав Штрбац вилєцел вонка и попонагляли зме ґу главному уходу до породзилїща. Дзецко сом дала чловекови котри обезпечовал будинок, а вон го далєй дал медицинским роботнїком. Предлужела сом на роботу и аж там ше здогадла же сом у „Бетаниї” нє зохабела податки. Врацела сом ше, и у присустве лїкарох и полициї дала вияву – приповеда Фейсова.
– Аж теди сом дознала же ше роби о хлапчикови, же є добре, же є на „зогриваню”, а шестри на Бетаниї го наволали „Сречко”, гварела Славица и додала же би сиґурно, без дилеми, кажде на єй месце зробел исто.
– Чкода же хлапчик так дочекани на тот швет, алє ше наздавам же ше дацо збудзе и же го одховаю добри людзе – гвари Фейсова.
О тим цо будзе далєй з дзецком одлучи Центер за социялну роботу, тирва и вишлїдзованє, а Славица дознала и потвердзела же дзецко тераз добре и о нїм ше стараю лїкаре и медицински шестри у Дзецинским шпиталю у Новим Садзе.