Главна тема рижни аспекти приватизациї локалних медийох

автор зам
776 Опатрене

НОВИ САД – Одбор за информованє Националного совиту (НС) Руснацох вчера у Заводзе за културу войводянских Руснацох отримал свою першу порядну схадзку у тим зволаню. У роботи схадзки участвовали штверо зоз седем членох Одбору, предсидатель НС Славко Рац, предсидатель Вивершного одбору НС Желько Ковач и секретар Совиту Таня Арва Планчак. Одбор розправял о рижних аспектох приватизациї локалних медийох, як и о структурних можлївосцох за унапредзенє квалитету информованя по руски.

1-Odbor-02

Членство упознате з найновшима збуванями, як и з активносцами хтори Координация националних совитох, члени Националного совиту Руснацох и його ресорного Одбору преберали и пребераю у намаганю же би ше у шицких наших штредкох отримало континуитет и квалитет информованя по руски. Насампредз потримани становиска Координациї, хтора вимага же би ше спомнути медиї нє приватизовало покля ше на державним уровню нє оформи цалосни законски рамик хтори оможлїви подполне сполньованє того меншинского права.

Понеже локалне медийне подприємство у Вербаше найскорей будзе загашене, представителє НС Руснацох и Одбору за информованє цо скорей буду контактовац локални власци у Општини Вербас, же би достали информацию на яки способ у новонастатей ситуациї тота локална самоуправа планує сполнїц законску обовязку – же би своїх гражданох информовала на шицких язикох хтори у службеним хаснованю у општини.

На Одборе бешедоване о алтернативних можлївосцох, як цо то проєкт з роботну назву „Рутенинфо”, хтори представел предсидатель НС Руснацох Славко Рац. Одбор препоручел запровадзованє порядней комуникациї членох координацийох подручних канцеларийох НС задлужених за информованє и руских медийох, дзе би шлїдом информацийох з канцеларийох, инициятиву мали мац медийни професионалци.

Одбор за информованє зоз 35 000 динари потримал вимогу Новинарскей асоцияциї Руснацох (НАР), за проєкт нового циклусу едукациї за занятих у наших медийох.

ПОВЯЗАНИ ТЕКСТИ