ЖАБЕЛЬ/НОВИ САД – Всоботу, 22. октобра, у голу ОШ „Милош Црнянски” у Жаблю отримани концерт хору „Пасторала”, на хторим шпивали и його солисти, алє и госци з иножемства – Ансамбл „Гажличанка” з Гажлини у Бардейовскей обласц у Словацкей и Шпивацка ґрупа Здруженя Лемкох з Ґорлицох, з Польскей.
На концерту шпивани народни шпиванки, та могли чуц сербски, лемковски, русински и словацки виходнярски шпиванки.
Шпиваче з иножемства у нашей жеми були на поволанку Союз Руснацох Українцох Сербиї, так же им домашнї бул предсидатель Союзу Боґдан Виславски.
Госци зоз Словацкей и Польскей внєдзелю, 23. октобра, присуствовали и на Служби Божей у нашей церкви св. апостолох Петра и Павла у Новим Садзе, а вечар участвовали на „Дньох українскей култури” у Индїї, у орґанизациї тамтейшого КУД „Калїна”.