КУЛА/ДЮРДЬОВ – Два представи Руского народного театру „Петро Ризнич Дядя” (РНТ) през викенд госцовали у наших местох – всоботу, 13. децембра, ансамбл националного театру у Кули одбави представу „Национална страґедия” автора и режисера Славка Ороса, а вчера, 14. децембра, у Дюрдьове представу „Береме ше, так нам и треба” Яна Лазорика, у режиї Силвестера Дорокхазия, хтора витворена у копродукциї з коцурским КУД „Жатва”.
Представа у Кули одбавена у театралней сали Културного центру, а дзекуюци домашньому Рускому КУД „Др Гавриїл Костельник”, хторе прейґ окремних обвисценьох до обисцох Руснацом у Кули, та прейґ Радия „Кулска комуна” поинформовало своїх членох о госцованю, представу РНТ провадзело красне число публики, котра ґлумцох наградзела з аплаузами и на отвореней сцени.
Ютредзень, у полней сали дюрдьовского КУД „Тарас Шевченко”, публика з моцнима аплаузами и шмихом привитала представу РНТ „Береме ше, так нам и треба”, хтора од премиєри у маю у Коцуре, до тераз виводзена у Руским Керестуре, Вербаше, тераз и у Дюрдьове, а нарок предлужи госцованя по наших местох.