ВИРАВА/СНЇНА (СЛОВАЦКА) – У месце Вирава у Словацкей, нєшка, 15. октобра, будзе семинар з нагоди 150-рочнїци народзеня педаґоґа, фолклористи и новинара Михайла Врабеля, а на ютре, 16. октобра, у Снїни Фестивал духовней писнї.
На семинаре з нагоди 150-рочнїци народзеня Врабеля, автора и позбераних народних писньох „Руски соловей”, зоз своїма сообщенями участвую Дюра Латяк и Микола М. Цап. У рамикох означованя ювилею будзе и панахида у месней грекокатолїцкей церкви, як и Шветочна академия у реконструованим Културним доме у Вирави, хтори з тей нагоди будзе и отворени. Програму орґанизую Союз Русинох-Українцох Словацкей, место Вирава и домашнї Дом култури.
На ютре у Снїни будзе 24. Фестивал духовней писнї, на хторим з нашей жеми участвує Хор „Гармония” з Нового Саду. Фестивал орґанизує Союз Русинох-Українцох Словацкей, вєдно з местом Снїна и Месним културно-просвитним центром.
Одход на обидва збуваня орґанизує Союз Руснацох Українцох Сербиї, чия делеґация, на чолє з предсидательом Союзу Боґданом Виславскийом, будзе присуствовац на програмох у Вирави и Снїни.