ГРАЖДАНЄ ВОДУ ОДНОША У КОРШОВОХ

автор бас
1.6k Опатрене

У центре Дюрдьова нєдавно отворена явна еко студня з котрей нєпреривно доступна пречисцена вода з општинского водоводу. Обєкт отримує Месна заєднїца, котра по розписованю тендера вибрала фирму котра задлужена за отримованє системи за пречисцованє води.

– Систему ше будзе преверйовац раз до мешаца, а фирма котра достала тендер будзе одвичательна же вода затримала квалитет котри по прикладнїку зоз студнї оценєл Институт за явне здравє Войводини – гварел Александар Голуб, секретар МЗ Дюрдьов.

Студню будзе отримовац фирма „Зирос” зоз Зренянину, а за тоту намену з буджета Месней заєднїци по децембер за кажди мешац опредзелєни 37 200 динари.

Месна заєднїца нарок з буджета планує видвоїц средства за вонкашнє отримованє будинку студнї. Затераз єст менши интевенциї, бо, наприклад, єдно з трох ошвиценьох розбите, а циви викривени на даскелїх местох. Под чопом, дзе чури вода, часто єст шмеца, та планує порадзиц з ЯКП „Услуги и отримованє” котра отримує явну поверхносц у општини, же би отримовала и простор коло того будинку.

Система у студнї може пейц годзини, кед нєстанє струї, самостойно робиц, алє проблем настава кед струї нєт длужей. Як секретар Голуб надпомнул, кед у валалє нєстанє води у часци водоводней мрежи на котру студня прикапчана, або кед нєт струї, система у еко студнї ше автоматски виключи и потребне ю ознова уключиц. Тоту роботу будзе вон окончовац.

Система сучасна, та годно и познєйше поставиц компютерске самоуключованє потим як придзе вода або струя, цо плановане поставиц, аж кед ше набави средства.

Гражданє Дюрдьова хасную воду зоз тей студнї, та часто мож видзиц як полня пейцлитрово коршови и одноша дому. Векшина з нїх тоту воду хаснує лєм за пице, а чежше ше звикую у нєй вариц єдзенє, або кафу, бо вец то цалком иншаки смак.

ПОВЯЗАНИ ТЕКСТИ