ДЮРДЬОВ – Вчера у просторийох КУД „Тарас Шевченко” у Дюрдьове треци рок за шором орґанизовани Гуманитарни полудзенок за найхудобнєйших гражданох того места.
По полудзенку и музичней програми, на хторей Тамбурови оркестер КУД „Тарас Шевченко” одграл даскельо композициї, присутним подзелєни гуманитарни пакети з рижнима потребнима продуктами, а орґанизована и безплатна томбола, на хторей вицаговани шмати, ручнїки и друге.
Орґанизацию тей гуманитарней акциї помогли вецей месни здруженя, а насампредз дзекуюци єдному стаємному донаторови з иножемства котри, крем за орґанизованє того сходу, уж шейсц роки кажди мешац дарує основни средства за гиґиєну и костиранє, як и огриву 25 найхудобнєйшим фамелийом у Дюрдьове.
У мено орґанизаторох сходу Йовґен Мудри подзековал на тей помоци, а визначел же ше орґанизаторе и надалєй буду намагац же би донатор бул задовольни з випоручованьом помоци, же би ше и надалєй на тот способ помагало Дюрдьовчаном котрим то потребне.
На полудзенку було сто особи, за дзепоєдних бул орґанизовани и превоз, а шицким котри нє могли присц, полудзенок и пакет з помоцу однєшени до обисца.