СЕРБИЯ/РУСКИ КЕРЕСТУР – Синдикат просвитних роботнїкох Сербиї „Нєзависносц“ и „Синдикат образованя Сербиї“ прешлого тижня подписали Спорозуменє и Колективни контракт з Министерством просвити и наявели же наставу нормализую од нєшка, 18. фебруара. Так и у керестурскей Школи „Петро Кузмяк“, як и у шицких других у кулскей општини, наставни годзини од нєшка буду тирвац 45 минути, потвердзела за Рутенпрес предсидателька Синдикату Школи „Петро Кузмяк“ Невенка Пєшчич.
Спомнути два синдикати пристали на Спорозуменє и подписали Контракт, док други два то одбили, та штрайк зоз скраценима годзинами предлужа члени Униї синдикатох просвитних роботнїкох Сербиї и Синдикат роботнїкох у просвити Сербиї. Вони одбили подписац Спорозуменє и Контракт прето же, як наведли, нєт ґаранциї же тото цо Министерство просвити обецало – будзе и сполнєте.
По Спорозуменю хторе подписали „Нєзависносц“ и „Синдикат образованя Сербиї“, до 1. юния би мали почац поради о суми и динамики виплацованя новорочней награди и помоци просвитним роботнїком, а Министерство обецало же од 1. януара до явного сектору уведзе платни класи.