БРИСЕЛ – Делеґация Войводини од вчера у Бриселу участвує на 14. Европским тижню реґионох и городох, хтори ше того року отримує з назву „Реґиони и городи за отримуюци и всеоблапни рост”.
Делеґация Покраїнскей влади под час тей манифестациї у Бриселу будзе мац велї схадзки з високима европскима службенима особами и билатерални стретнуца з представителями других реґийох.
З програму предвидзени и округли стол, на хторим буду представени потенцияли за прицагованє инвестицийох и моцнєнє економского розвою Покраїни, а у контексту главних темох тогочного Европского тижня реґионох и городох – отримуюци економски рост и поєдноставйованє инструментох за приступанє ґу европским структурним и инвестицийним фондом.
Нєшка у Мисиї Републики Сербиї у Бриселу будзе дзень представяня Войводини, а делеґацию Скупштини Войводини и Покраїнскей влади предводза їх предсидателє – Иштван Пастор Иґор Мирович.