БЕОҐРАД – Делеґация ЕУ у Сербиї спозорела же Европска комисия уж длугши час у своїх рочних звитох поволує на приношенє закона о финансованю Войводини и же тот правни акт ище хиби.
У делеґациї ЕУ у Сербиї думаю же уровень автономиї нїзших уровньох власци у жеми одлука держави члена ЕУ, як и жеми хтора кандидат за ЕУ.
– Источашнє, владанє права ше муши почитовац. Устав Сербиї предписал же ше Закон о финансованю Войводини муши прилапиц. Европска комисия у своїх рочних звитох поволує на тото уж длугши час и тот правни акт ище вше хиби – пише у одвиту делеґациї за РТВ.
У нїм пише и же би капацитети и ресурси нїзших уровньох власци мали одвитовац їх одвичательносци, та же треба обезпечиц одвитуюци консултациї, кед слово о законодавстве хторе на нїх ма импликациї.